Неделя о расслабленном и память вмч. Георгия Победоносца

Месяца апреля в 23-й день.

Неделя четвертая по Пасце, разслабленнаго

Святаго славнаго великомученика, победоносца и чудотворца Георгиа

В субботу, на Малей вечерни, на Господи, воззвах, стихиры воскресны, 4, глас 3:

Стих: От стражи утренния до нощи, от стражи утренния, да уповает Израиль на Господа.

Твоим Крестом Христе Спасе, смерти держава разрушися, и диаволя прелесть упразднися: род же человеческий верою спасаемый, песнь Тебе всегда приносит.

Стих: Яко у Господа милость, и многое у Него избавление, и Той избавит Израиля от всех беззаконий его.

Просветишася всяческая, Воскресением Твоим Господи, и рай паки отверзеся: вся же тварь восхваляющи Тя, песнь Тебе всегда приносит.

Стих: Хвалите Господа вси языцы, похвалите Его вси людие.

Славлю Отца и Сына силу, и Святаго Духа пою власть, нераздельное, несозданное Божество, Троицу Единосущную, царствующую в век века.

Стих: Яко утвердися милость Его на нас, и истина Господня пребывает во век.

Кресту Твоему честному покланяемся Христе, и Воскресение Твое поем и славим: раною бо Твоею мы вси исцелехом.

Слава, святаго, глас 1. Самогласен:

Великаго Царя воине Георгие, радуйся и веселися, Богу бо благоугодил еси о всех нерадив, живот вечный приял еси на небесех: тело бо твое всяк недуг от человек отгонит. Христос бо, Егоже возлюбил еси, Той тя прославляет, блаженне.

И ныне: Богородичен, догматик, глас 3:

Превелие чудо: Дева рождшая, и рожденное Бог, прежде век предъявленное рождение, и совершенное паче естества. О таинства страшнаго, еже и мыслимое неизреченно пребывает, и зримое не поемлется! Блаженна Ты еси Пречистая Отроковице, Адама земнороднаго Дщи, и Бога Вышняго явльшаяся Мати: Того моли спастися душам нашим.

На стиховне стихира воскресна, глас 3:

Страстию Твоею Христе, омрачивый солнце и светом Твоего Воскресения, просветивый всяческая, приими нашу вечернюю песнь Человеколюбче.

И святаго, стиховна Великия вечерни с припевы его. Глас 4.

Подобен: Званный свыше:

Восхваляют людие псалмы, вкупе и песньми, твою славную память, Георгие: яко благолепна бо возсия и светоносна, украшена славою и благодатию. Темже играют ныне ангельстии чини, хвалят же мученицы со апостолы твоих подвиг, мучениче, страдания, и воспевают прославльшаго тя Спаса Христа Бога нашего. Егоже моли, спасти и просветити души наша.

Стих: Праведник яко финикс процветет, яко кедр, иже в Ливане, умножится.

Облечен во Христово всеоружие, обрелся еси, Георгие, не ищущим тебе: ты бо за Христа огнем распалаемь, и ругаяся богов суетных безбожному свирепству, тогда воинствую Царю моему Христу, беззаконным взывал еси, ни зверие, ни колеса же, ни ина мука, мене разлучити возмогут когда любве Христа моего. Егоже. моли, спасти и просветити души наша.

Стих: Насаждени в дому Господни, во дворех Бога нашего процветут.

Небрег о сосудех многообразных, и о различных муках, и о оружиях страшных, венценосче Георгие, благочестия мученически течение скончал еси. Темже пресветлую память твою цветы песненными венчаем, и честныя твоя облобызаем верою мощи: но яко престолу предстоя Владыки, Христа Бога нашего, молити не престай, спасти и просветити души наша.

Слава, святаго, глас тойже:

Приидите, мучениколюбцы, песненное пение воставшему из гроба Христу принесем: днесь бо весна разумная возсия нам, подающи цветы словесныя, всемирная память Георгиа, мудраго великомученика. Егоже достойно почитающе, приемлем исцелений источники: с нимиже и ныне того умолим, молитися непрестанно Спасу Христу, мир вселенней даровати, и душам нашим велию милость.

И ныне: праздника, глас 8:

В притворе Соломонове, тамо слежаше множество немощствующих, и преполовившуся празднику, обрете Христос тридесять осмь лет разслаблена лежаща, Владычним гласом глаголет к нему: хощеши ли здрав быти? Немощствуяй отвещаваше: Господи, человека не имам, да егда возмутится вода, ввержет мя в купель. Он же глаголет к нему: возми одр твой, и ходи: се здрав был еси, ктому не согрешай. Богородицы молитвами низпосли нам велию милость.

Тропарь воскресен, глас 3:

Да веселятся небесная, да радуются земная, яко сотвори державу мышцею Своею Господь: попра смертию смерть, первенец мертвых бысть, из чрева адова избави нас, и подаде мирови велию милость.

Слава, святаго, глас 4:

Подвигом добрым подвизался еси, страстотерпче Христов верою, и мучителей обличил еси нечестие, жертва же благоприятна Богу принеслся еси. Темже и венец приял еси победы, и молитвами, святе, твоими, всем подаеши прегрешений прощение.

И ныне, Богородичен. Глас тойже:

Еже от века утаеное, и ангелом несведомое таинство: Тобою Богородице сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Ектениа малая, и отпуст.

На Велицей вечерни, по обычной кафисме, на Господи, воззвах: стихиры воскресны гласа, 3, глас 3:

Стих: Изведи из темницы душу мою, исповедатися имени Твоему.

Твоим Крестом Христе Спасе, смерти держава разрушися, и диаволя прелесть упразднися: род же человеческий верою спасаемый, песнь Тебе всегда приносит.

Стих: Мене ждут праведницы, дондеже воздаси мне.

Просветишася всяческая, Воскресением Твоим Господи, и рай паки отверзеся: вся же тварь восхваляющи Тя, песнь Тебе всегда приносит.

Стих: Из глубины воззвах к Тебе Господи, Господи, услыши глас мой.

Славлю Отца и Сына силу, и Святаго Духа пою власть, нераздельное, несозданное Божество, Троицу Единосущную, царствующую в век века.

Ины стихиры самогласны, о разслабленном. Глас 1:

Стих: Да будут уши Твои, внемлюще гласу моления моего.

Стих: Аще беззакония назриши Господи, Господи, кто постоит? Яко у Тебе очищение есть.

Дланию пречистою создавый человека, пришел еси Благоутробне недугующия исцелити Христе, разслабленнаго во Овчей купели, словом Твоим возставил еси: кровоточивой же болезнь исцелил еси: хананеи отроковицу стужаемую помиловал еси, и прошения сотника не презрел еси. Сего ради зовем: всесильне Господи, слава Тебе. [Дважды.]

Стих: Имене ради Твоего, потерпех Тя Господи, потерпе душа моя в слово Твое, упова душа моя на Господа.

Непогребен мертвец сый, разслабленный видев Тя, возопи: помилуй мя Господи, яко одр мой гроб мне бысть. Что ми приобретение живота? Не требую Овчия купели, не имам бо никогоже влагающа мя, возмущающимся водам: но к Тебе источнику прихожду исцелений, да и аз со всеми зову: всесильне Господи, слава Тебе.

И святаго, глас 4.

Самоподобен:

Стих: От стражи утренния до нощи, от стражи утренния, да уповает Израиль на Господа.

Яко добля в мученицех, страстотерпче Георгие, сошедшеся днесь восхвалим тя, яко течение совершив, веру соблюл еси, и прият от Бога победы твоея венец: Егоже моли, от тли и бед избавитися, верою совершающим всечестную память твою.

Подобны:

Стих: Яко у Господа милость, и многое у Него избавление, и Той избавит Израиля от всех беззаконий его.

Твердым мудрованием уповав, самохотне дерзнул еси, якоже лев, славне, к страданию, презирая убо тело, яко растлетися хотящее: о нетленней же души, мудре, прилежал еси, и мук многообразными виды разжеглся еси, яко злато очищено седмерицею, Георгие.

Стих: Хвалите Господа вси языцы, похвалите Его вси людие.

За Спаса пострадал еси, и смертию смерти вольне, славне, подобяся, царствуеши с Ним светло, порфирою от крове одеян светлою, и скиптром страданий твоих украшен, и венцем победы лепотствуя, в непроходимыя веки, великомучениче Георгие.

Стих: Яко утвердися милость Его на нас, и истина Господня пребывает во век.

Веры бронями, и щитом благодати, и креста копием вооружився, сопротивным непобедимь был еси, Георгие: и яко божественный храборник, демонская ополчения победив, со ангелы ликуеши, верныя же заступаеши и освящаеши, и спасаеши призываемый.

Слава: глас 5:

Взыде Иисус во Иерусалим на Овчую купель, глаголемую иудейски Вифесда, пять притворов имущую: в тех бо слежаше множество немощствующих. Ангел бо Божий по вся лета сходя, возмущаше ю, и здравие подаваше приступающим верою. И видев Господь многовременна человека, глаголет к нему: хощеши ли здрав быти? Немощствуяй отвещаваше: Господи, человека не имам, да егда возмутится вода, ввержет мя в купель: врачем издах все имение мое, и милости улучити не сподобихся. Но Врач душ и телес глаголет к нему: возми твой одр и ходи, проповедуя Мою силу, и велию милость в концех.

И ныне, Богородичен, глас 3:

Како не дивимся Богомужному Рождеству Твоему, Пречестная? Искушения бо мужескаго не приемши Всенепорочная, родила еси без отца Сына плотию прежде век от Отца рожденнаго без матере, никакоже претерпевшаго изменения, или смешения, или разделения, но обою существу свойство цело сохраншаго. Темже Мати Дево Владычице, Того моли спастися душам, православно Богородицу исповедающих Тя.

Вход. Прокимен дне: и чтения святаго, 3.

Пророчества Исаиина чтение. [Глава 43.]

Тако глаголет Господь: вси языцы собрашася вкупе, и соберутся князи от них: кто возвестит сия в них? или яже от начала, кто слышана сотворит вам? Да приведут свидетели своя, и оправдятся, и да услышат, и да рекут истину. Будите Ми свидетели, и Аз свидетель, глаголет Господь Бог, и отрок, егоже избрах, да познаете, и веруете Ми, и разумеете, яко Аз есмь, прежде Мене не бысть ин бог, и по Мне не будет: Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог: и еще от начала Аз есмь, и несть от рук Моих избавляяй. Сотворю, и кто отвратит то? Сице глаголет Господь Бог, избавляяй вас, Святый Израилев.

Премудрости Соломони чтение. [Глава 3.]

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие, сокрушение: они же суть в мире. Ибо пред лицем человеческим аще и муку приимут, упование их безсмертия исполнено, и вмале наказани бывше, великими благодетельствовани будут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему: яко благодать и милость в преподобных Его, и посещение во избранных Его.

Премудрости Соломони чтение. [Глава 4.]

Праведник, аще постигнет скончатися, в покои будет. Старость бо честна не многолетна, ниже в числе лет исчитается: седина же есть мудрость человеком, и возраст старости житие нескверное. Благоугоден Богови быв, возлюблен бысть, и живый посреде грешник преставлен бысть: восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: угодна бо бе Господеви душа его: сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихира храма, и святаго самогласны.

Глас 1. Анатолиево:

Светлый храборник Георгий в славнем страдании своем горния силы веселит, и с ними радуяся ныне, и на земли верныя торжествовати воздвиже, и спраздновати нам: того ради собраным, яко Христов раб прииде. Темже убо его достойно почтим, непрестанно молящася всех Богу, даровати нам велию милость.

Доблественными страдании возделав лучшая, труды плодов твоих Христу принесл еси, преблаженне мучениче Георгие, верою желание утвердив, надеждею страх отринув, любовь стяжал еси небесную, прехвальне. Дерзновение имея убо, благоприятными мольбами, проси душам нашим мира, очищения же грехов, и велия милости.

Глас 4:

Приидите, верных собори, приидите, праздник составим: ибо пресветлая память днесь явися страстотерпца Георгиа, наша просвещает невидимо сердца, добродетельми блистающи. Темже единомудренно воспевающе, рцем: радуйся, воине великаго Царя Христа, радуйся, пресветлая похвало веры, радуйся, всесветле и пребогате. О нас, преблаженне, всех Владыку Христа Бога моли, сохраненным быти от искушений лукаваго, и спасти души наша.

Слава, глас 5. Феофаново:

Возсия весна, приидите, насладимся, просия Воскресение Христово, приидите, возвеселимся, страстотерпца память верныя просвещающи показася. Темже, празднолюбцы, приидите, тайно ту торжествуем: сей бо яко добр воин, мужествовав на мучителей, и сих посрами, подобник быв страсти Спаса Христа, не помилова сосуда своего бреннаго, но нага обостри, муками того изменяя. Тому возопием: страстоносче, моли, спастися душам нашим.

И ныне, праздника. Глас тойже:

При Овчей купели, человек лежаше в немощи, и видев Тя Господи, вопияше: человека не имам, да егда возмутится вода, ввержет мя в ню. Егда же прихожду, ин предваряет мя, и приемлет исцеление: аз же немощствуяй лежу. И абие умилосердився Спас, глаголет к нему: тебе ради Человек быв, тебе ради в плоть облекохся, и глаголеши: человека не имам: возми одр твой и ходи. Вся Тебе возможна, вся послушают, вся повинуются: всех нас помяни, и помилуй Святый, яко Человеколюбец.

На стиховне стихира воскресна, глас 3:

Страстию Твоею Христе, омрачивый солнце и светом Твоего Воскресения, просветивый всяческая, приими нашу вечернюю песнь Человеколюбче.

И стихиры Пасце, с припевы их:

Стих: Да воскреснет Бог и расточатся врази Его.

Пасха священная нам днесь показася: Пасха нова святая: Пасха таинственная: Пасха всечестная: Пасха Христос Избавитель: Пасха непорочная: Пасха великая: Пасха верных: Пасха, двери райския нам отверзающая: Пасха, всех освящающая верных.

Стих: Яко исчезает дым, да исчезнут.

Приидите от видения, жены благовестницы, и Сиону рцыте: приими от нас радости благовещения Воскресения Христова: красуйся, ликуй и радуйся, Иерусалиме, Царя Христа узрев из гроба, яко жениха происходяща.

Стих: Тако да погибнут грешницы от Лица Божия, а праведницы да возвеселятся.

Мироносицы жены, утру глубоку предсташа гробу Живодавца, обретоша Ангела на камени седяща, и той, провещав им, сице глаголаше: что ищете Живаго с мертвыми? Что плачете Нетленнаго во тли? Шедше, проповедите учеником Его.

Стих: Сей день, егоже сотвори Господь, возрадуемся и возвеселимся в онь.

Пасха красная, Пасха, Господня Пасха! Пасха всечестная нам возсия. Пасха! Радостию друг друга обымем. О Пасха! Избавление скорби, ибо из гроба днесь, яко от чертога, возсияв Христос, жены радости исполни, глаголя: проповедите апостолом.

Слава, глас 4, самогласен. Студитово:

Разумнаго адаманта терпение, братие, духовно восхвалим, Георгиа славнаго мученика, егоже за Христа разжигаема, коваху беды, и изостриша муки, и различная мучения изнуриша тело естеством тленно: побеждаше бо желание естество, смертию понуждая рачителя, прейти к желаемому Христу Богу, и Спасу душ наших.

И ныне: праздника, глас 8:

В притворе Соломонове, тамо слежаше множество немощствующих, и преполовившуся празднику, обрете Христос тридесять осмь лет разслаблена лежаща, Владычним гласом глаголет к нему: хощеши ли здрав быти? Немощствуяй отвещаваше: Господи, человека не имам, да егда возмутится вода, ввержет мя в купель. Он же глаголет к нему: возми одр твой, и ходи: се здрав был еси, ктому не согрешай. Богородицы молитвами низпосли нам велию милость.

На благословении хлебов, тропарь, Богородице Дево: дважды, и святаго единожды, глас 4.

Яко пленных свободитель и нищих защититель, немощствующих врач, православных поборниче, победоносче, великомучениче Георгие, моли Христа Бога, спастися душам нашим.

И чтение в Деяниих апостольских.